إخبارية سياسية - لاسعة - لاذعة - حاقدة - غير محايدة

مفتى القبلات

اصدر المفكر جمال البنا كتاب جديد ( قضيه القبلات وبقيه الاجتهادات ) وفى هذا الكتاب يشرح وجهه نظره في الفتاوى التي أعلنها بإباحته للقبلات بين الشباب والفتيات ويعيد طرح قضايا أثارت جدل

والبنا لمن لا يعرفه حاصل على مؤهل عالي في التجارة من الجهة العمالية أي أن الرجل ليس لديه أي مؤهل شرعي يؤهله للفتوى والرجل تخصص في الانفراد بفتاوى من فتاوى ( مش حتقدر تغمض عينيك ) مستمدا فتواه من قانون سكسونيا وبوس الواوه وقانون يسرا وسعد الصغير وإيناس الدغيدى يعنى مع مفكرنا جمال البنا الدنيا جميلة وشعر المرأة ليس عوره .. اكشفي واللي يبان منك زكاه عنك .. وصلى من غير حجاب هو انتى لسه حتلبسى وتغطى شعرك .. مع مفكرنا جمال البنا كمان حتقدرى تؤمي الرجال في الصلاة

 

ويا سلام لو صوتك حلو حتخدى حسنات اكتر لأن الرجال حتتمنى الصلاة تطول واعد ياست .. مع مفكرنا جمال البنا الاختلاط ضرورة حتى لو حدثت بعض الأخطاء عشان عزل الرجال عن النساء وحشيه وقسوة خالص .. مع مفكرنا جمال البنا لو عاوزة تجوزي فمش مهم ولى الأمر ولا شهود ولا مهر المهم يبقى في رضا وتوافق بين الرجل والمرأة سيبك من اللي ربى وتعب هو يربى وأنتي تجوزي البوى فرند بتاعك زي ماانتى عاوزة وحتى قبل الجواز ممكن تمشى مع البوى فرند بتاعك وتبوسو بعض وكمان ممكن تزنوا مره وتندموا عشان دة مش اسمه زنى اسمه لمم وربنا يغفره بالأعمال الصالحة وكمان متخافيش لما تتجوزي البوى فرند بتاعك مش حيقدر يطلقك ألا بموافقتك يعنى الرجل لو حلف عليكى مليون يمين طلاق مايقدرش يطلقك ألا بموافقتك .. مع مفكرنا جمال البنا لاضروره للحجاب عشان دة مش من الإسلام وان ده كان في مجتمعات ذكوريه خصصت المرأة للبيت والرجل للعمل ولم يكن مزعجا للمرأة لكن الدنيا تغيرت ولم يعد ضرورة للحجاب يعنى البنطلون المحزق اكتر سترة وحشمه من الفستان .. مع مفكرنا جمال البنا اشرب سجاير وأنت صائم وصيامك مقبول مقبول يا ولدى بس متزدتش عن أربع سجاير ليه لحكمه يعلمها الله سبحانه وتعالى.

 

مع مفكرنا جمال البنا مفيش حد للرده ادخل واخرج من الإسلام براحتك ولا يهمك مش عاوزين نعقد الأمور .. مع مفكرنا جمال البنا اجمع صلاه الظهر والعصر والمغرب مع العشاء في الشغل اهم شئ مش عاوزين نعطل مصالح الناس .. من الأخر مع مفكرنا جمال البنا أنت ضامن المتعة في الدنيا وفى الآخرة الجنه وحسبنا الله ونعم الوكيل

قد يعجبك ايضا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد