إخبارية سياسية - لاسعة - لاذعة - حاقدة - غير محايدة

الدوام لله

GetAttachment(29)

محمد محمد علي جنيدي

جاني صاحبي بيعاتبني
قالّي مُش هتعزِّي فيها
قلتلو .. مين اللي ماتت؟
قالّي أحلى شيء ف. عمرك
وف. حياتي وف. حياتك
قلتلو مين اللي ماتت!
قالَّي لسّه مُش عارفها!!
دانت عايش في نعيمها وفي عذابها
وانت دايب في حروفها وفي زمانها
داحنا من خدَّامها يا بني
من هنا وضَّحلِي قصده
وابتديت اخد بيدُّه
بسِّ بردو
قلتلو مُش دي اللي ماتت
مين يقول الكلمه تفنى..
أو تموت ف.قلوب شريفه
لا يا صاحبي.. الكلمه عايشه
بسِّ هِرْبِتْ من حياتنا
أيوه هربت من حياتنا
لمّا تبقى الكلمه شايفه
النَّاس بتفخر بالخيانه
وامّا تبقى الكلمه شاهده
الذوق بيهرب م. الحنايا
وامّا نخلف في وعودها
ولّا نحرق في عهودها
لمّا تتجمَّع سيوفنا ف. يوم عليها
ونطاردها ف. كلِّ محفل ونعاديها
لمّا بنبدِّل حروفها
ولّا نسخر من جمالها
لمّا نار الحقد تحتل المدينه
وامّا أمّك ولّا أمِّي تموت حزينه
ليه هَتُصْبُر ع. اللي فينا!
ليه هَتِبقَى ف. يوم علينا!
ليه نبيعها وتشترينا!
لا يا صاحبي.. الكلمه عايشه
بسِّ هربت من حياتنا
أيوه هربت من حياتنا
بسِّ عارف أمته هربت من حياتنا
لمّا صدق الحبِّ هاجر من قلوبنا
والمعاني الحلوه غرقت باختيارنا
كان ضروري يكون طريقها
غير طريقنا
لمّا هَجْرِتْنا البلابل
وارتضينا البوم يغنِّي ف. المحافل
كان ضروري يكون طريقها
غير طريقنا
قل بصدقك يا صديقي
وانت حلمي ونور يقيني
هيّه لمّا الدُّنيا ع.المظلوم بتقسى
وامّا نبقى لكلِّ جاني بيت ومَرْسَى
تفتكر.. الكلمه ترضى تعيش مابنّا
تفتكر.. تفضل تدوق النّار
ونار البغض منّا
ليه هتُصبر ع. اللي فينا!
ليه هتبقَى ف. يوم علينا!
ليه نبيعها وتشترينا!
كان ضروري يكون طريقها
غير طريقنا
شوف يا صاحبي
لوعايزني اقبل تعازي أو أعزِّي
يلَّا بينا
كلّ يوم بتموت قلوبنا
والسَّبب منَّا وفينا
ألف آه من كلِّ قلبي
ألف آه من كلِّ قلبي
والدوام لله يا صاحبي
الدوام لله.

محمد محمد علي جنيدي
عنوان 9 شارع مصطفى كامل متفرع من شارع الجمهورية / بني سويف / جمهورية مصر العربية
ت منزل وفاكس 002082231602 —– ت محمول 0020105785807
[email protected]

 
 

قد يعجبك ايضا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد