إخبارية سياسية - لاسعة - لاذعة - حاقدة - غير محايدة

قــهــوة .. ســـــادة

dena saeed asem

للشاعرة دينا سعيد عاصم

 
( زجل باللهجة المصرية )

 

والعمى فعين الحرامي

الحرامى

اللي سارقنا

وحاطط

من شقانا كحل عينه..

ربنا بينا .. وبينه

اللي خلانا شحتنا..

واللي قاسمنا فقوتنا

يبنى قصر لغول كبير

غول ..مخالبه في رقابنا

والأساس للقصر ..قوتنا ..

وف عَمَاره ..خراب بيوتنا ..

وان بنينا .. فيوم حيطان تستر علينا

يخترع له كام جباية

عالحيطان اللى حيلتنا

من دمانا… من دموعنا…لمّْ للظالم .. وباعنا

لجل كرشه.. يدوم .. وعرشه

نابه في لحم الغلابة ..

لجل ماتشبع ديابه..

يسرق اللقمة ..

وغموسها..

من دِمَا ثكلى ..ويتامىَ ..

اه يا ظالم …

بكره ساعة حق

فيها يتفتح باب المحاكم …

نقرا أوراق القضية .. .. فيها تتفضح المظالم

والحرامي ..واللي ظالم ..

موش هتنفعله وصيه .. موش هتنفعله عبادة

ويوم ما يسألني حبايبي ..

كل غلبان واتحرم نسمة هوا

كل عيان مات ومش لاقى الدوا

كل شيخ راكع و ساجد ..

كل من بالسِّـبْحة مادد ..

ايد ..

ولابس بنطلون ..

أو جلابية ..

(هوإمتى الحق عاد.. بالسكوت..أو حسن نيه ..)

والحرامي .. واللي ظالم ْ..

واللي عاش للزور في كام مليون شهادة

واللي حاطط شرع ربه ..

خلف ظهره لجل أصحاب السعادة ..

واللي أصبح شكر ربه..

بعد أصحاب السيادة ..

موش هتنفعله عبادة ..

لو هتسألني يا صاحبي

إمتى قلبي .. يسْـتِرَيَّـحْ..

لو هتسأل إمتى ..

روح مجروحه .. تفرح ..

يوم ما أشرب ..

وف صوان كل اللي خانوا

قــهــوة .. ســـــادة

 

 

 

 

دينا سعيد عاصم

 

كاتبة وشاعرة مصرية

 

قد يعجبك ايضا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد