اتقابلنا ف وقت صعب

إتقابلنا ف وقت صعب
وقت كان العشق كدبة ومستحيل
والزمن
كان بياخد منا جنب
والضلوع زى القنابل
واقفة على شد الفتيل
كان قدرنا بنرسمه حبة دواير
واد وبنت
بنت جدلت صبرها بعزم الضفاير
وواد نزل من قطر غربة
وقبل ما يحط الشنط فوق الرصيف
أكله قضبان الرحيل
كان نفسى أنام وارتاح على خدك عنب
وأجمع قطوف الخوف ورمان الصبايا
صبت كيزان الحزن ف رحايا الغريب
ماكنتش تعرف يعنى إيه كلمة رحايا
زى الطواحين اللى دايرة من هوى التايه
ومدورين ترسين عرايا
كان الجرس فوق المحطة بينضرب جامد
تفتكرى إيه كان البديل
ومشيت ياقطر الغربة بتكمل للقدر سطرين
شبكة إيدين وكفوف دموع وفراق ضلوع
مهروسة بين غنى الطواحين
وحروف بتحلم بالدفى وسط القصايد
لكن قدرها بينتهى ف شباك تذاكر
كل ما أذاكر
يختفى الحلم المسافر
ويتوه الإسم ف العناوين