عارفة عيونك تشبه مين؟؟؟؟؟
تشبه قمر الليل السارح بضفيرتين
تشبه غيط القمح الدايخ
علشان يعمل سنبلتين
تشبه ورق التوت الأخضر
لما يغلس ع الأغصان
أو بيعاكس جوة ف خدك تفاحتين
تشبه درس الكيميا الصعب
حاصل ضرب حرارة قلبى x ضغط عنيكى
شىء بيعدى الحل تملى ب كراستين
تشبه كل عقارب قلبى
لما بتجرى ف وقت لقانا
ودايما تسبق بدقيقتين
عينك ليه بتقولى حديت؟؟؟؟؟
خدك ليه مليان حواديت؟؟؟؟؟
ورد الدنيا بيزعل ليه!!!؟؟؟
لما بنيجى ونهتف عندك تحت البيت
أو بنحدف رمانتين
فاكرة النخلة؟؟
كبرت فوق التل وطرحت
طرحت زيك عشق حلال
عارف طبعا
كل الناس هتقول هوّال
أول ما أمسك قلمى وهكتب
إنى لأول مرة بقابل
وش ملايكة بغمازتين
ليلة إمبارح
قلبى إصطادلك عصفورتين
قلب مفكر نفسه ف حرب
طالع نازل يبدأ عشقك برصاصتين
قلب بيعشق جوة ف خدك جدول ضرب
حاصل ضرب حنينى x شوقى
ناتج حالة (عشق)² مربع أس إتنين
كنت ف عينك طفل صغيّر
حلمه معلق بالشخابيط
يرسم وردة.يرسم شجرة .يزرع غيط
يرسم زى ماقلبه يقوله
عمرى ف لحظة ما كنت عبيط
أو بريالة
كنت ب أكسر فيكى الصعب
فاكرة هتافنا ف وقت الثورة؟؟
كانت تشبه نفس الحالة
ثورة عاشق للحرية
والحرية حكاية شعب
بس الفرق اللى ف خلخالك
إنى ف عينك طفل صوغير
وإن الثورة
ثورة عاشق للتنطيط
نفسى أكتبلك ألف قصيدة
مليون معنى ف قلب الحرف
عايز أقولك إنى بحبك
أد ما ب أكره عزة الجرف
أد ما ب أكره مرشد سوسن
أو تغريدة صاحبه عصام
قبل ما تقلب منى سياسة
م المستحسن
إنى أبطل أى كلام
وإنى أوقف عند عنيكى
قبل ما أشوه أحلى قصيدة بناس مجانين
قصد القول
إنت يا أحلى عيون حلوين
مش موجودة إلا ف حالتين
حالة عشق يقينى مؤكد
وحالة عاشق سحر عنيكى
واخد فيهم سجن مؤبد
يعنى خلاصة القصة ف جملة
"إنى بحبك ف الحالتين"